44 günlük Vətən müharibəsi Azərbaycan xalqının çoxəsrlik dövlətçilik tarixində milli iradəmizin, birliyimizin və tarixi ədalət uğrunda mübarizəmizin ən parlaq təcəssümlərindən biridir. 2020-ci il sentyabrın 27-də başlayan və 44 gün davam edən Vətən müharibəsi xalqımızın yaddaşına qəhrəmanlıq, fədakarlıq və Vətən sevgisi ilə yazılıb.

Milli Məclisin deputatı Günay Ağamalı “Aktual Xəbər”ə müsahibəsində Vətən müharibəsinin tarixi əhəmiyyətindən, Zəfərin əldə olunmasında xalq-Ordu birliyinin rolundan, şəhid və qazilərimizin qəhrəmanlığından, tarixi yaddaşın qorunmasının vacibliyindən və işğaldan azad edilmiş ərazilərdə aparılan bərpa-quruculuq işlərindən danışıb.

– Günay xanım, 44 günlük Vətən müharibəsinin Azərbaycan tarixində əhəmiyyətini necə qiymətləndirirsiniz?

– 44 günlük Vətən müharibəsi Azərbaycan xalqının çoxəsrlik dövlətçilik tarixində Qələbə, milli iradəmizin, birliyimizin və tarixi ədalət uğrunda mübarizəmizin ən parlaq təcəssümüdür. 2020-ci il sentyabrın 27-də başlayan və 44 gün davam edən müharibə xalqımızın yaddaşına qəhrəmanlıq, fədakarlıq və Vətən sevgisi ilə yazıldı.

Otuz ilə yaxın müddətdə Azərbaycan torpaqları Ermənistanın işğalı altında qaldı. Yüz minlərlə soydaşımız doğma yurdlarından didərgin salındı, şəhər və kəndlərimiz dağıdıldı, tarixi-mədəni və dini irsimizə qarşı vandalizm törədildi. Beynəlxalq hüququn norma və prinsipləri, BMT Təhlükəsizlik Şurasının qətnamələri uzun illər kağız üzərində qaldı. Azərbaycan isə bütün bu müddət ərzində öz haqqından geri çəkilmədi və ərazi bütövlüyünün bərpasını dövlət siyasətinin əsas prioritetlərindən biri kimi qorudu.

– Zəfərin əldə olunmasında xalqın milli iradəsi və dövlət-Ordu birliyini hansı amillər şərtləndirdi?

– 44 günlük Vətən müharibəsi göstərdi ki, xalqın milli iradəsi, güclü dövlətçilik ənənəsi və qüdrətli Ordu vahid məqsəd ətrafında birləşəndə qarşıya qoyulan ən mürəkkəb tarixi vəzifələri belə həll etmək mümkündür.

Prezident, Müzəffər Ali Baş Komandan İlham Əliyevin qətiyyətli rəhbərliyi ilə Azərbaycan Ordusu döyüş meydanında tarix yazdı. Cəbrayıl, Füzuli, Zəngilan, Qubadlı, Şuşa və yüzlərlə yaşayış məntəqəsinin azad edilməsi xalqımızın illərlə qəlbində yaşatdığı Böyük Qayıdış arzusunu gerçəyə çevirdi.

Bu Qələbənin arxasında illərlə aparılan məqsədyönlü dövlət siyasəti, müasir ordu quruculuğu, diplomatik mübarizə, xalq-prezident birliyi və Azərbaycan əsgərinin misilsiz qəhrəmanlığı dayanır.

– Vətən müharibəsində şəhid və qazilərimizin göstərdiyi qəhrəmanlığı necə dəyərləndirirsiniz?

– Zəfərimizin ən uca zirvəsində şəhidlərimizin müqəddəs xatirəsi dayanır. Vətən torpaqlarının azadlığı naminə canından keçən qəhrəmanlarımız ölkəmizin ərazi bütövlüyünü öz qanları ilə bərpa etdilər.

Qazilərimizin şücaəti, əsgər və zabitlərimizin mərdliyi xalqımızın qəhrəmanlıq salnaməsinə əbədi həkk olunub. Biz bu Qələbənin hansı böyük fədakarlıqlar bahasına əldə edildiyini heç zaman unutmamalıyıq. Şəhidlərimizin əziz xatirəsinin daim uca tutulması, qazilərimizin və şəhid ailələrinin diqqət və qayğı ilə əhatə olunması dövlətimizin və cəmiyyətimizin mühüm vəzifələrindəndir.

– Zəfər tarixinin gələcək nəsillərə çatdırılması baxımından tarixi yaddaşın rolunu necə qiymətləndirirsiniz?

– Tarixi yaddaş dövlətçiliyin əsas dayaqlarındandır. Keçmişini unudan xalq gələcəyini etibarlı şəkildə qura bilməz. İşğal illərində xalqımızın yaşadığı faciələri, Xocalı soyqırımını, şəhidlərimizin taleyini, Vətən müharibəsinin hər bir qəhrəmanlıq səhifəsini qorumaq və gələcək nəsillərə çatdırmaq ümummilli vəzifədir.

Zəfərimizin tarixini, ona aparan mübarizə yolunu və bu Qələbənin hansı fədakarlıqlar hesabına qazanıldığını gələcək nəsillərə ötürmək bizim mənəvi borcumuzdur. Bu yaddaş müstəqilliyimizin, ərazi bütövlüyümüzün və milli birliyimizin hansı böyük mübarizə və fədakarlıqlar hesabına qorunduğunu gələcək nəsillərə çatdırmağa xidmət edəcək.

– İşğaldan azad edilmiş ərazilərdə aparılan bərpa və quruculuq işlərini Zəfərin davamı kimi qiymətləndirmək olarmı?

– Əlbəttə. İşğaldan azad edilmiş ərazilərimizdə aparılan genişmiqyaslı quruculuq və bərpa işləri Vətən müharibəsində əldə olunan Zəfərin davamıdır. Azərbaycan əsgərinin canı və qanı bahasına azad etdiyi doğma torpaqlarımız bu gün dövlətimizin həyata keçirdiyi genişmiqyaslı bərpa və quruculuq layihələri ilə yenidən dirçəlir.

Qarabağa və Şərqi Zəngəzura həyat qayıdır. Keçmiş məcburi köçkünlərin ata-baba torpaqlarına qayıdışı dövlətimizin qüdrətinin və tarixi ədalətin bərpasının ən mühüm göstəricilərindən biridir. Bu proses Azərbaycanın qarşısında yeni inkişaf perspektivləri açır.

– Bu gün Vətən müharibəsi Zəfərinin əsas mesajı və hər bir Azərbaycanlının qarşısında duran vəzifə nədir?

– 44 günlük Vətən müharibəsi dünyaya sübut etdi ki, Azərbaycan xalqı öz taleyini özü müəyyənləşdirən, haqqını qorumağı bacaran və dövlətinin ətrafında sıx birləşən qüdrətli xalqdır.

Bu gün hər bir Azərbaycanlının üzərinə düşən əsas vəzifə əldə olunmuş tarixi nailiyyətləri qorumaq, milli həmrəyliyimizi daha da möhkəmləndirmək və güclü Azərbaycan dövlətinin gələcəyinə xidmət etməkdir.

Zəfərimiz milli qürurumuz, şəhidlərimiz əbədi yaddaşımız, müstəqil və qüdrətli Azərbaycan isə qoruyub yaşatmalı olduğumuz ən böyük dəyərimizdir. Şəhidlərimizin əziz xatirəsi qarşısında dərin ehtiramla baş əyir, qazilərimizə möhkəm cansağlığı arzulayıram. Uca Tanrı Prezident, Müzəffər Ali Baş Komandan İlham Əliyevi qorusun, qüdrətli Azərbaycanın daha da güclənməsi və dövlətimizin qarşısında duran strateji hədəflərin həyata keçirilməsi yolunda fəaliyyətində daim uğurlar nəsib etsin!