Güclü Azərbaycan naminə

Azərbaycanın müasir tarixində mühüm siyasi və strateji əhəmiyyət daşıyan yeni mərhələ başlayıb. Ölkəmizin ərazi bütövlüyünün və suverenliyinin tam bərpa olunması Azərbaycanın qarşısında yeni inkişaf perspektivləri açıb, milli hədəflərini və gələcək vəzifələrini daha da aktuallaşdırıb. Məhz belə mühüm tarixi şəraitdə 2026-cı il oktyabrın 2-də keçirilən Yeni Azərbaycan Partiyasının VIII Qurultayı xüsusi siyasi əhəmiyyət daşıyır. Azərbaycanın ərazi bütövlüyünün və suverenliyinin tam bərpasından sonra ilk dəfə keçirilən qurultay ölkəmizin qarşısında dayanan yeni vəzifələrin müəyyənləşdirilməsi baxımından mühüm hadisədir.
Prezident, Yeni Azərbaycan Partiyasının Sədri cənab İlham Əliyev qurultaydakı nitqində tədbirin yeni ictimai-siyasi və geosiyasi şəraitdə keçirildiyini vurğulayaraq Azərbaycanın əldə etdiyi tarixi nailiyyətlərə, bölgədə yaranmış yeni reallıqlara və qarşıda duran vəzifələrə diqqət çəkib. Dövlət başçısı İkinci Qarabağ müharibəsində qazanılmış tarixi Zəfərin əhəmiyyətindən, 2023-cü il sentyabrın 20-də ölkəmizin ərazi bütövlüyünün və suverenliyinin tam bərpa olunmasından danışıb.
Bu tarixi nəticələrə aparan yol Ulu Öndər Heydər Əliyevin müəyyən etdiyi dövlətçilik strategiyası ilə sıx bağlıdır. VIII Qurultayda Ulu Öndərin Azərbaycanın müstəqilliyinin möhkəmləndirilməsi, dövlətçiliyimizin qorunması və inkişafı istiqamətindəki misilsiz xidmətləri xüsusi qeyd olunub. Prezident İlham Əliyev Heydər Əliyevin tarixi roluna toxunaraq bildirib ki, Ulu Öndər Azərbaycanda olmadığı dövrdə baş verən hadisələrə fərqli yanaşılardı və əgər həmin vaxt ölkədə olsaydı, Qarabağda separatizm meyillərinin baş qaldırmasına imkan verməzdi.
Bu fikirlər Heydər Əliyevin Azərbaycan dövlətçiliyinin formalaşması və möhkəmlənməsindəki rolunun miqyasını bir daha nümayiş etdirir. Bu gün Ulu Öndərin müəyyənləşdirdiyi siyasi xətt Prezident İlham Əliyev tərəfindən müasir dövrün tələblərinə uyğun şəkildə davam etdirilir. Güclü dövlət quruculuğu, iqtisadi müstəqilliyin möhkəmləndirilməsi, milli maraqların qorunması, ordunun gücünün artırılması və Azərbaycanın beynəlxalq mövqeyinin daha da möhkəmləndirilməsi bu siyasətin başlıca istiqamətləridir.
VIII Qurultayda diqqət yetirilən mühüm məsələlərdən biri də ideoloji işin müasir tələblərə uyğun təşkili və bu sahədə yeni yanaşmaların tətbiqidir. Prezident İlham Əliyev partiyanın qarşısında duran vəzifələrdən danışarkən Azərbaycanın real nailiyyətlərinin cəmiyyətə çatdırılmasının, formal tədbirlərdən və şablon yanaşmalardan uzaqlaşmağın vacibliyini xüsusi vurğulayıb. Dövlət başçısının qurultaydakı çıxışında səsləndirdiyi fikirlər bu baxımdan xüsusi əhəmiyyət daşıyır:
“İdeoloji işimiz, o cümlədən partiya fəalları tərəfindən elə aparılmalıdır ki, Azərbaycan reallıqları, ölkəmizdə gedən işlər, çox müsbət ab-hava daim ictimai müzakirədə olsun. Bu gün Azərbaycanda elə genişmiqyaslı quruculuq işləri aparılır ki, bilmirəm hansı ölkədə buna bənzər quruculuq işləri var. Mən təkcə Qarabağı, Şərqi Zəngəzuru nəzərdə tutmuram, halbuki orada da misli görünməmiş inkişaf var, hər bir bölgədə. Ona görə ideoloji işin düzgün qurulması, şablonlardan əl çəkmək, hansısa formal xarakter daşıyan tədbirlərdən əl çəkmək vaxtı gəlib çatıb. Yəni yeni, müasir ideoloji işlər aparılmalıdır. Bizim üstünlüyümüz ondan ibarətdir ki, bəzi ölkələrdən fərqli olaraq bizə əfsanə yaratmaq lazım deyil. Bəzi ölkələrdə bəzi rəhbərlər həm keçmişdə olan bəzi nailiyyətləri öz adlarına çıxarmaq istəyirlər, yaxud da ki, tarixi təhrif edərək öz rollarını şişirtmək istəyirlər, bizə bu lazım deyil. Bizə lazımdır ki, həqiqətlər hər bir vətəndaşa çatsın.”
Prezidentin bu çağırışı ideoloji fəaliyyətin mahiyyətini və gələcək istiqamətlərini aydın şəkildə ortaya qoyur. Azərbaycanın qazandığı nailiyyətlər, həyata keçirilən genişmiqyaslı layihələr, ölkənin iqtisadi və siyasi potensialının artması, Qarabağ və Şərqi Zəngəzurda aparılan bərpa-quruculuq işləri cəmiyyətə dolğun və obyektiv şəkildə çatdırılmalıdır. Bunun üçün müasir kommunikasiya imkanlarından səmərəli istifadə edilməli, ictimaiyyətlə əlaqələr daha çevik qurulmalı, xüsusilə gənclərin maraq və informasiya tələbatı nəzərə alınmalıdır.
Bu prosesdə gənclərin üzərinə mühüm məsuliyyət düşür. Azərbaycan reallıqlarını dərindən bilmək, milli tariximizi öyrənmək, qazanılmış Zəfərin əhəmiyyətini düzgün dərk etmək və həqiqətlərin geniş ictimaiyyətə çatdırılmasında fəal iştirak etmək gənclərin qarşısında duran əsas vəzifələrdəndir. Dövlətçilik ənənələrinə bağlılıq, milli-mənəvi dəyərlərə hörmət, bilik və savad müasir dövrdə gənclərin ictimai mövqeyini müəyyənləşdirən mühüm amillərdir.
İnformasiya texnologiyalarının sürətlə inkişaf etdiyi, sosial şəbəkələrin ictimai rəyə təsir imkanlarının genişləndiyi və süni intellektin yeni imkanlar yaratdığı müasir dövrdə informasiya savadlılığı da xüsusi əhəmiyyət kəsb edir. Belə bir şəraitdə gənclərin yalnız məlumat əldə etməsi deyil, həm də informasiyanı düzgün qiymətləndirməsi, tarixi faktları təhriflərdən ayırması və əsaslandırılmış mövqe nümayiş etdirməsi vacibdir. Təhsil, elmi biliklərə yiyələnmək, müasir texnologiyaları mənimsəmək və vətənpərvərlik ruhunda formalaşmaq bu baxımdan mühüm rol oynayır.
Gənc nəslin üzərinə düşən vəzifələrdən biri də Ulu Öndər Heydər Əliyevin zəngin dövlətçilik irsini dərindən öyrənmək, Prezident İlham Əliyevin rəhbərliyi ilə Azərbaycanın əldə etdiyi nailiyyətləri düzgün qiymətləndirmək və bu irsin gələcək nəsillərə çatdırılmasına töhfə verməkdir. Çünki dövlətimizin gələcək inkişafı həm də milli dəyərləri qoruyan, müasir biliklərə yiyələnən, təşəbbüskar və məsuliyyətli gənclərin fəaliyyətindən asılıdır.
Bu gün Qarabağ və Şərqi Zəngəzurda genişmiqyaslı bərpa və quruculuq işləri davam edir, Böyük Qayıdış proqramı çərçivəsində doğma yurdlarına qayıdan insanların məskunlaşması və bölgələrin iqtisadi potensialının bərpası istiqamətində mühüm addımlar atılır. Qarşıda duran əsas vəzifələr əldə edilmiş tarixi nailiyyətləri qorumaq, dövlətimizin gücünü daha da artırmaq, ölkəmizin hərtərəfli inkişafını təmin etmək və gələcək nəsillər üçün möhkəm təməl yaratmaqdır.
Yeni Azərbaycan Partiyasının VIII Qurultayında müəyyənləşdirilən vəzifələr də bu hədəflərə çatmaq baxımından mühüm istiqamət verir. Partiyanın üzvləri, fəallar və xüsusilə gənclər ölkənin ictimai-siyasi həyatında fəal iştirak etməli, müasir çağırışlara uyğun təşəbbüslərlə çıxış etməli və Azərbaycanın inkişafına öz töhfələrini verməlidirlər. Azərbaycan gəncliyinin biliyi, təşəbbüskarlığı, vətənpərvərliyi və dövlətçilik mövqeyi ölkəmizin gələcək inkişafında mühüm rol oynayacaq. Tarixi nailiyyətlərdən güc alan, müasir dünyanın çağırışlarına hazır olan və milli maraqları rəhbər tutan gənc nəsil Azərbaycanın daha qüdrətli dövlətə çevrilməsi naminə qarşıya qoyulan məqsədlərin həyata keçirilməsinə layiqli töhfə verə bilər.

Nübar Bayramova,
Salyan Rayon Heydər Əliyev Mərkəzinin direktoru, YAP-nın VIII Qurultayının nümayəndəsi