Dövlətimizin gücü və ideoloji təhlükəsizliyimiz

Müasir dünyada dövlətlərin gücü yalnız iqtisadi imkanları və hərbi qüdrəti ilə deyil, həm də milli maraqlarını qorumaq, müstəqil siyasət yürütmək və cəmiyyətdə sabitliyi təmin etmək bacarığı ilə ölçülür. Bu gün beynəlxalq münasibətlərdə müşahidə olunan gərginliklər, müxtəlif münaqişələr və ölkələrə qarşı yönələn təzyiqlər təhlükəsizlik məsələsinin nə qədər vacib olduğunu göstərir. Belə bir şəraitdə Azərbaycanın öz inkişaf yolunu müəyyənləşdirməsi, milli maraqlarını qətiyyətlə müdafiə etməsi və xalqımızın əmin-amanlıq şəraitində yaşaması dövlət siyasətinin mühüm nəticələrindəndir.
Prezident İlham Əliyev Yeni Azərbaycan Partiyasının VIII Qurultayında çıxışı zamanı ölkəmizin təhlükəsizliyi, müstəqil siyasəti və ideoloji təhdidlərdən qorunması ilə bağlı mühüm məsələlərə toxunub. Dövlət başçısının qeyd etdiyi kimi, fiziki təhlükəsizliklə yanaşı, ideoloji təhlükəsizliyin təmin olunması da daim diqqət mərkəzində saxlanılmalıdır. Çünki müasir dövrdə dövlətlərə qarşı təzyiqlər yalnız ənənəvi vasitələrlə deyil, informasiya məkanında yayılan yalanlar, əsassız iddialar və cəmiyyətin düşüncəsinə təsir göstərməyə yönələn müxtəlif üsullarla da həyata keçirilir.
Azərbaycanın müstəqil siyasəti, beynəlxalq aləmdə artan nüfuzu və milli maraqlarına əsaslanan qərarları ölkəmizin mövqeyini daha da möhkəmləndirib. Dövlətimizin öz seçimlərini özü etməsi, heç bir xarici qüvvənin diktəsi ilə hərəkət etməməsi müstəqilliyimizin əsas göstəricilərindəndir. Bu siyasətin nəticəsində Azərbaycan həm regionda, həm də daha geniş beynəlxalq məkanda etibarlı tərəfdaş kimi tanınır. Ölkəmizin əldə etdiyi nailiyyətlər, xüsusilə ərazi bütövlüyümüzün və suverenliyimizin bərpası xalqımızın birliyinin, dövlətimizin qətiyyətinin və Ordumuzun gücünün parlaq ifadəsidir.
Bununla belə, əldə olunan uğurlar dövlətimizin və cəmiyyətimizin üzərinə yeni məsuliyyətlər qoyur. Müstəqilliyi qorumaq, sabitliyi davam etdirmək və milli maraqlarımızı gələcək nəsillərə ötürmək üçün hər bir vətəndaş öz mövqeyini aydın müəyyənləşdirməlidir. Dövlətə bağlılıq yalnız sözlə deyil, görülən işlə, qanunlara hörmətlə, ictimai məsuliyyətlə və ölkənin inkişafına verilən töhfə ilə təsdiqlənir. Xüsusilə gənclərin ölkəmizin keçdiyi tarixi yolu, qazandığı nailiyyətləri və qarşıda duran vəzifələri dərindən bilməsi vacibdir.
İdeoloji təhlükəsizlik məsələsi bu gün daha çox informasiya mühiti ilə əlaqəlidir. İnternet və sosial şəbəkələr məlumat əldə etmək imkanlarını genişləndirsə də, eyni zamanda yanlış məlumatların və təhrif olunmuş fikirlərin sürətlə yayılmasına şərait yaradır. Bəzən müəyyən hadisələr məqsədli şəkildə fərqli təqdim olunur, faktlar kontekstdən çıxarılır, cəmiyyətdə çaşqınlıq yaratmağa hesablanmış məlumatlar yayılır. Belə hallarda hər bir vətəndaşın məlumatı tənqidi qiymətləndirməsi, onun mənbəyinə diqqət yetirməsi və yoxlanılmamış informasiyanı yaymaqdan çəkinməsi mühüm əhəmiyyət daşıyır.
Statistik məlumatlara münasibətdə də obyektivlik və dəqiqlik əsas meyar olmalıdır. Rəqəmlər hadisə və proseslərin real mənzərəsini anlamağa kömək edir, lakin onların düzgün şərh edilməsi, müqayisələrin əsaslı aparılması və nəticələrin faktlara söykənməsi vacibdir. Hər hansı göstəricini ümumi vəziyyətdən ayıraraq təqdim etmək yanlış təsəvvür yarada bilər. Buna görə də ictimaiyyətə çatdırılan məlumatların etibarlı mənbələrə əsaslanması, faktların təhrif edilməməsi və məsuliyyətlə paylaşılması sağlam informasiya mühitinin formalaşmasına xidmət edir. Bu yanaşma yalnız peşə fəaliyyətində deyil, gündəlik həyatda və sosial şəbəkələrdən istifadə zamanı da əsas götürülməlidir.
Yeni Azərbaycan Partiyasının VIII Qurultayında səsləndirilən fikirlər partiya üzvlərinin və fəallarının qarşısında da mühüm vəzifələr müəyyənləşdirir. Dövlətimizin uğurlarının ictimaiyyətə çatdırılması, milli maraqlarımızın müdafiəsi, cəmiyyətdə sağlam düşüncə tərzinin təşviqi və ideoloji təxribatlara qarşı prinsipial mövqe nümayiş etdirilməsi bu fəaliyyətin əsas istiqamətlərindəndir. Bunun üçün faktlara əsaslanan izahat işi aparmaq, insanlarla səmimi ünsiyyət qurmaq, gənclərin təşəbbüslərinə dəstək vermək və ölkəmizin inkişafı ilə bağlı məsələlərə obyektiv yanaşmaq lazımdır.
Gənc nəslin dövlətçilik ənənələrinə, milli-mənəvi dəyərlərə və vətənpərvərlik prinsiplərinə bağlılığı da ideoloji təhlükəsizliyin mühüm dayaqlarındandır. Vətən sevgisi ölkəmizin tarixinə hörmət, milli maraqların qorunması, dövlətimizin uğurlarına sahib çıxmaq və gələcək inkişafında fəal iştirak etmək deməkdir. Azərbaycan xalqının qazandığı tarixi Qələbə, suverenliyimizin tam bərpası və ölkəmizin qarşısında açılan yeni imkanlar gənclər üçün həm qürur mənbəyi, həm də məsuliyyət nümunəsidir. Bu nailiyyətlərin mahiyyətini anlamaq, onları düzgün qiymətləndirmək və gələcək nəsillərə çatdırmaq hər birimizin vəzifəsidir.
Bu gün Azərbaycanın sabitliyinin və təhlükəsizliyinin qorunması yalnız dövlət qurumlarının fəaliyyəti ilə məhdudlaşmır. Cəmiyyətin birliyi, vətəndaşların məsuliyyətli davranışı, milli maraqlara sədaqət və informasiya mühitində ayıq mövqe nümayiş etdirmək də ümumi təhlükəsizliyimizin tərkib hissəsidir. Hər kəs öz fəaliyyət sahəsində dürüstlük, peşəkarlıq və məsuliyyət prinsiplərini əsas götürməklə ölkəmizin inkişafına töhfə verə bilər.
Prezident İlham Əliyevin VIII Qurultaydakı çıxışından irəli gələn vəzifələrə uyğun olaraq, ideoloji təhlükəsizliyin möhkəmləndirilməsi, dövlətimizin müstəqil siyasətinin dəstəklənməsi və milli birliyin qorunması istiqamətində fəaliyyətimizi davam etdirməliyik. Azərbaycanın qazandığı uğurların qorunması və yeni nailiyyətlərin əldə olunması üçün dövlətlə xalqın həmrəyliyi, sağlam vətəndaş mövqeyi və gələcəyə məsuliyyətlə yanaşma mühüm şərtlərdir.

Elnur Hüseynov,
Salyan rayon Statistika İdarəsinin rəisi, VIII Qurultayın nümayəndəsi