Esmira Günəşin "Oğul düşmən çəpəridir!" Kitabının təqdimatı oldu

Hüseynli Əliheydər Səlahəddin oğlu 1994-cü il aprel ayının 14-də Agstafa rayonu Qırılı kəndində ziyalı ailədə, müəllim ailəsində anadan olub. Əliheydər ailədə həsrətlə gözlənilən övlad , üç bacının bir qardaşı son beşik olub.
1-ci sinifə 2000-ci ildə Qırılı kəndində Sirac Əliyev adına (kəndin ilk şəhidi) tam orta məktəbə gedib.2006-2009-cu illərdə təhsilini Agstafa şəhər Texniki Təmayüllü liseydə davam etdirib. 2011-ci il ildə  məktəbi müvəffəqiyyətlə bitirib elə həmin ildə də Azərbaycan Texniki Univeritetinin İnformasiya  Texnologiyalar Sistemləri mühəndisliyi fakültəsinə daxil olub. 2015-ci ildə həmin Univesiteti bitirib. Doğma Vətənə olan borcunu yerinə yetirmək üçün həqiqi hərbi xidmətə yollanıb. Ziyalı gəncimiz "Qırılı  Gənc Ziyalılar Birliyinin”  təsisçilərindən biri olub. Əliheydərin də bütün gənclər kimi böyük arzuları vardı. Nişanlı idi. Ailəsi onun toyuna hazırlaşırdı. 
Bakı şəhərində yaşayıb və 2017-ci ildən etibarən “Azərişıq ASC”nin Nərimanov rayon şöbəsində nəzarətçi-mühəndis vəzifəsində çalışıb. Ancaq işini Ağstafaya dəyişən qəhrəmanımız uzun müddət işləyə bilmir. Vətən müharibəsi başlayan vaxt könüllü yazılıb cəbhəyə yollanır. Füzuli, Cəbrayıl bölgələrindəki amansız, qanlı döyüşlərdə aslan kimi, canavar kimi döyüşdü igidimiz.  Eyni zamanda neçə-neçə özü kimi qəhrəman yaralı silahdaşlarını ölümün pəncəsindən xilas edərək təhlükəsiz əraziyə yerləşdirdikdən dərhal sonra yenidən döyüşə atılır.
     Anası onun döyüşə qatıldığını bilmir. Hər dəfə anasına hər şey yaxşıdı deyən qəhrəmanımız bacılarına anasını dəfələrlə əmanət edib. Sonuncu dəfə  8 noyabrda Xocavənddən zəng edib, anasına  sevinə-sevinə zəfər nailiyyətlərini, sürətlə irəlilədiklərini, torpaqları azad etdikləri deyib.
      Sanki ürəyinə dammışdı,  Şəhadət şərbətini içərək. Vətənin qoynuna əbədiyyən qovuşacağını, Vətən torpağına qarışaraq onun bir parçası olacağını bilən igidimiz “Ana, ALLAHA əmanət olun, biz irəli gedirik” deyəndə halallaşırdı. Elə nişanlısı ilə son danışığında “Qayıtmasam məni bağışla"- deyərək sağollaşıb.
 11 gün heç bir xəbər olmayan qəhrəmanımızın, 19 noyabr 2020-ci il tarixində şəhid xəbəri gəlib. Noyabrın 9-da Xocavənd də Üç təpə istiqaməti  uğrundakı döyüşlərdə böyük şücaət göstərərək bədəninin 3 yerindən aldığı ağır qəlpə yaraları nəticəsində Qələbəyə 4 saat qalmış qəhrəmancasına şəhid olub.
       21 noyabr 2020-ci ildə Ağstafa torpağı igid övladını əbədiyyən qoynuna alır.
Ruhun şad olsun, şəhidim! Qəhrəmanlığın kitabalarla tarixə iz salacaq.

Aprelin 18-i Xəzər rayon MKS-nin təşkilatçılığı ilə Esmira Günəşin Ağstafa şəhidi Əliheydər Hüseynlinin xatirəsinə həsr etdiyi "Oğul düşmən çəpəridir!" kitabına onlayn təqdimat keçirildi. Tədbiri kitabxananın şöbə müdiri Nilufər xanım başlayaraq şəhidimizin həyatından bəhs edən povestdən bir parça səsləndirdi. Daha sonra sözü Esmira Günəşə verdi. Şairə xanım kitabıyla bağlı geniş məlumat verərək bildirdi ki, Ağstafanın Qırılı kəndinin şəhidi Əliheydər Hüseynlinin xatirəsinə həsr etdiyi "Oğul düşmən çəpəridir!" kitabı dörd fəsildən ibarətdir. İlk fəsil şəhidimizin həyatından bəhs edən povestlə başlayıb, ikinci fəsildə doğmalarının xatirələri yer alır, daha sonra şəhidimizə həsr olunan şeirlərin yer aldığı kitabın son fəsli onun həyatına aid hekayələrlə yekunlaşır. 
Daha sonra şəhidimizin anası Zabilə xanım çıxış edərək, hər kəsə təşəkkürünü bildirir. Bacıları bir-bir xatirələrindən danışaraq izləyiciləri kövrəldir. Ağstafa rayon MKS-in rəhbəri Solmaz xanım və eləcə də Qırılı kənd kitabxanasının rəhbəri də çıxış edərək kitabların bir tarix olduğunu, tarix yazan qəhrəmanların kitablarla tarixə çevrildiyini qeyd edirlər. Bir çox digər şəhid ailələrinin də iştirak etdiyi tədbirdə şəhid ailələri də çıxış edərək, kitabla bağlı duyğularını dilə gətirib, şəhidlərimizi tanıdan hər kəsə təşəkkür etdiblər. Tədbirin bədii hissəsində şairə Esmira Günəşlə yanaşı kitabda şeirləri yer alan digər şairə Əsli İsmayılqızı da şeirlər səsləndirib. Şəhidimizin bacısı qızı balaca Nigarın və şairə Esmira Günəşin oğlu Elgünün şeirləri də diqqətlə dinlənərək,  bəyənilib. Sonda hər kəsə təşəkkür olunaraq tədbir yekunlaşıb. Onu da qeyd edək ki, təqdimat zamanı iştirakçılar şəhidimizi guşəsi ilə də tanış olublar.

Kanal4.az