“Biz cari ildə Azərbaycan “Dövlət Televiziya və Radio Verilişləri” Qapalı Səhmdar Cəmiyyətində maliyyə hesabatlarının auditini aparmışıq”.

Kanal4.az, xəbər verir ki, bunu Apa-ya açıqlamasında Hesablama Palatasının sədri Vüqar Gülməmmədov bildirib.

V. Gülməmmədov deyib ki, audit nəticəsində bəzi maliyyə pozuntuları aşkarlanıb: “Bununla bağlı məsələ Hesablama Palatası Kollegiyasında müzakirə olunub, müvafiq Kollegiya qərarı qəbul edilib. Kollegiya qərarında AzTV rəhbərliyinə bəzi tədbirlərin həyata keçirilməsi tövsiyə olunub, bəziləri haqqında ciddi qərar qəbul olunub. Bunlar, əsasən, televiziyanın inkişafı ilə bağlı institusional məsələlərin həllidir. Maliyyə hesabatlarında bəzi gəlir və xərclərin təhrif olunması nəzərə alınaraq, o hesabatlara yenidən baxılması tövsiyə olunub. Televiziya işçilərinin əməkhaqqı və qonorar sistemi ilə bağlı yol verilmiş bəzi pozuntuların dövlət büdcəsinə bərpası, ümumiyyətlə, əməkhaqqı və qonorar sistemini tənzimləyən yeni sənədin hazırlanmasını tövsiyə etmişik. Bununla yanaşı, QSC-nin gəlirlərinin, xüsusən reklamdan əldə olunan gəlirlərin şəffaflaşması ilə bağlı tədbirlərin görülməsini də Kollegiya qərarında qeyd etmişik. Müvafiq vaxt verilib, bizdə olan məlumata görə, televiziya rəhbərliyi bu sahədə tədbir görülməsinə başlayıb”.

Bu arada, “Azərbaycan Televiziya və Radio Verilişləri” Qapalı Səhmdar Cəmiyyəti Hesablama Palatasının QSC-də aparılmış auditin nəticələri ilə bağlı açıqlama yayıb.

QSC-nin Sosial media və ictimaiyyətlə əlaqələr şöbəsindən verilən məlumata görə, açıqlamada qeyd olunan pozuntu halları 2015-ci ilə aid və indiki dövrə uyğun olmayan maliyyə nizamnaməsinə görə yaranıb.

Bildirilib ki, hazırda 2015-ci ilə aid olan və müasir dövrün tələblərinə uyğun gəlməyən maliyyə nizamnaməsinin yenidən işlənilməsi, əməkhaqqı və qonorar sistemini tənzimləyən yeni sənədin hazırlanması, həmçinin struktur islahatlarının aparılması və bir-birini təkrarlayan artıq ştat vahidlərinin ləğv olunması istiqamətində işlər davam etdirilir: “Eyni zamanda müəyyən postlarda vəzifə dəyişikliyi aparılır. Reklam siyasətinin şəffaflaşdırılmasına gəldikdə isə burada reklam vəsaitlərinin mənimsənilməsindən deyil, sadəcə gəlir və xərclərin hesabatlılığının şəffaf şəkildə aparılmasından söhbət gedir ki, bu istiqamətdə də görüləcək işlərdən biri elektron şəbəkə sisteminin yaradılmasıdır.

Əməkhaqqı və qonorar sistemində qeyd olunan qanun pozuntuları da əməkdaşların maaş və qonorarlarının artırılmasından irəli gəlir. Belə ki, hazırda AzTV-də iş həcmi və məhsuldarlıq əvvəlki dövrlərlə müqayisədə ən azı iki dəfə artıb. Məhsuldarlığın artması isə heç şübhəsiz ki, maaş və qonorarların artırılması deməkdir. Amma 2015-ci ilə aid maliyyə nizamnaməsi buna imkan vermirdi. Həmin nizamnaməyə əsasən redaktor ən yaxşı halda 500-600 manat maaş almalıdır. Etiraf edək ki, hazırda heç kim qeyd olunan məbləğə redaktorluq işini yerinə yetirməyə razı olmaz. Lakin iş də getməlidir. Belə olan halda da maliyyə pozuntuları yaranırdı. Palata məhz həmin pozuntuları müəyyən edərək AzTV-yə irad bildirib. Qeyd etdiyimiz kimi, artıq maliyyə nizamnaməsinin yenidən işlənilməsi və bu günün şərtləri ilə uyğunlaşdırılması istiqamətində iş gedir. Hətta bu məqsədlə əlavə müxəssislər cəlb etmişik.

Hesablama Palatasının üç ay ərzində AzTV-də apardığı yoxlamalar və müəyyən etdiyi maliyyə problemlərindən irəli gələrək ortaya qoyduğu tövsiyə və qərarlara görə təşəkkür edirik. Çünki istənilən yoxlama və ortaya çıxan qüsurların aradan qaldırılması istiqamətində atılan addımlar ümumi işin xeyrinədir”.